LAOAG CITY – Inrakurak ti maysa a nangato nga opisial ti Iran nga isardeng ti Tehran dagiti panagraot daytoy agingga a saan nga ituloy ti Estados Unidos ti airstrike kontra iti pagilianda kalpasan nga inpasardeng ni United States President Donald Trump ti agarup dua a lawas a kampania ti panagbomba.
Segun iti opisial, nagtalinaed ti takder ti Iran nga agibales laeng daytoy no rumaot manen ti Estados Unidos.
Inbatadna a naipadanon metten ti Iran ti nasao a mensahe iti Washington ngem nakasagana daytoy a mangiwayat ti nalawlawa a panagraot no ituloy ti Amerika dagiti panagatakeda.
Mainaig iti daytoy, kuna ni United States Ambassador to the United Nations Mike Waltz a temporario nga inpasardeng ni Presidente Trump ti airstrike tapno agbalin a wagas iti diplomasia ken kadagiti posible a panagsinnarita.
Nupay kasta, inlawlawag ti Iranian official a nagtalinaed nga agdudua ti Tehran iti gagem ti Washington ken mamati a mabalin nga istratehia laeng ti panagsardeng ti operasion.
Nangrugi ti kampania ti airstrike ti Estados Unidos kas sungbat kadagiti panagatake ti Iran kadagiti barko a dumaldalyasat iti Strait of Hormuz.
Iti baet ti temporario a panagsardeng ti opensiba, nagtalinaed a nangato ti tension iti rehion kabayatan nga agtultuloy a banbantayan ti nagduduma a pagilian ti posible a kumaro manen ti riribok.
