LAOAG CITY – Maragsakan ni Ms. Shey Pia Abaya, mangidadaulo iti Public Employment and Service Office PESO ditoy siudad ti Laoag iti adadda pay a panangipalawa ni Presidente Ferdinand Marcos Jr. iti panggedan kadagiti Pilipino.
Segun kenkuana, babaen iti gannuat ni Presidente Marcos ket rinibu a Pilipino ti maikkan ken matulungan a makasapol ti panggedan.
Mainaig iti daytoy, kunana a kas paset ti PESO network, mainspirarda nga ituloy ti gagemda a mangpapigsa kadagiti programa a mangpasayaat iti panggedan ken mangi-asideg iti ad-adu pay a gundaway iti trabaho kadagiti umili .
Inbatadana a pudno a makaparagsak a nangeganna kenni Presidente Marcos Jr. ti kaadu dagiti job fair a naisayangkat iti intero a pagilian ken dagiti rinibu a hired-on-the-spot (HOTS) applicants kabayatan ti State of the Nation Address wenno SONA-na.
Kuna ni Abaya a daytoy a panangbigbig ket mangpaneknek ti commitment ti gobierno iti panagpataud iti adado pay a trabaho.
Innayonna pay a tunggal naballigi a job fair ket maysa nga addang nga agturong iti pannakapasayaat iti biag ken pannakabangon ti napigpigsa a puersa ti panagtrabaho para iti nasion.
