LAOAG CITY – Nakaisubmitiren ti amin a pinag-subpoena ti Senate impeachment court para iti tax ken bank records ni Vice President Sara Duterte, ti asawana a ni Atty. Mans Carpio ken ti 19 a corporate entities pakairamanan ti maysa a law firm.
Inbatad ni Impeachment Court Spokesperson Atty. Reginald Tongol a naisubmitiren iti Impeachment Clerk of Court Atty. Renato Bantug Jr., dagiti dokumento ti Bureau of Internal Revenue (BIR), Anti-Money Laundering Council (AMLC) ken dagiti pribado a bangko pakairamanan ti:
1. BDO Unibank
2. Philippine Savings Bank
3. Metrobank
4. LANDBANK
5. Security Bank
6. Bank of the Philippine Islands (BPI)
Kuna met ni Bantug a sumagmamano kadagiti bangko ti nagkiddaw ti nayon nga aldaw tapno makaisubmitir ti nayon a dokumento.
Karaman iti submission ti Bureau of Internal Revenue iti tax records ni Vice President Sara ti authorization manipud iti Presidente.
Saan pay laeng a mabalin a lukatan dagiti dokumento gapu ta kasapulan pay laeng nga ikkan ti kopya ti prosekusion ken depensa ken aguray pay ti sumaruno a pammilin manipud iti impeachment court.
