LAOAG CITY – Natay ti 11 a pulis idinto a 28 a dadduma pay ti nasugatan kalpasan iti panangtambang kadakuada dagiti armado a lallaki iti maysa a police checkpoint iti probinsia ti Khyber Pakhtunkhwa iti amianan a laud iti Pakistan nga asideg ti nagbedngan ti Afghanistan.
Basar kadagiti lokal nga otoridad, nangrugi ti panagatake iti distrito ti Hangu kalpasan a tinarget dagiti suspek ti checkpoint usar dagiti quadcopter nga adda ti intugotda a pagpabettak sakbay a rinaotda.
Nagpaut ti sumagmamano nga oras ti rinnupak iti nagbaetan dagiti islamist group ken security forces no sadinno nga adda ti 15 a suspek ti natay.
Karaman kadagiti pimmusay ni Deputy Superintendent Diyar Khan a naipatulod iti lugar tapno tumulong kadagiti naka-duty a pulis.
Inbatad ni District Police Officer Mujahid Hussain nga inuram dagiti armado ti tallo a lugan ti pulisia ken intarayda pay ti maysa a police vehicle sakbay a naglibas dagitoy.
Awan pay ti grupo a nangaklon iti nasao a panagatake ngem napasamak daytoy sumagmamano nga aldaw kalpasan ti maysa a suicide bombing kontra kadagiti suldado a Pakistani iti kaparanget a distrito ti Tank a tinagikua ti Tehreek-e-Taliban Pakistan.
Agtultuloy a kumarkaro ti kinaranggas kadagiti lugar nga asideg iti pagbedngan ti Pakistan ken Afghanistan a masansan a ti target kadagiti panagatake ket dagiti pulis ken militar.
Inpetteng ti gobierno ti Pakistan nga us-usaren dagiti armado a grupo ti Afghanistan kas paglemmengan para iti panagsanay ken panagplano dagiti panagraot iti pagilianda.
