LAOAG CITY – Saan a bumaba iti 20 nga indibidual ti natay kalpasan a napasaran ti nakaro a panaglayos iti amianan a daya a paset ti Afghanistan.
Basar iti Taliban-run government, kadakkelan a nadadael ti nairekord iti siudad ti Parun, ti kabisera ti probinsia ti Nuristan.
Malaksid kadagiti natay, saan a bumaba iti 80 nga indibidual ti nasugatan gapu iti kellaat a panaglayos.
Nadakamat a manamnama a ngumato pay ti bilang dagiti natay gapu ta sumurok 100 a tattao pay ti naipadamag a mapukpukaw.
Insigida a nangiwayat ti search and rescue operations dagiti otoridad iti lugar ngem madanaganda a manayon pay ti bilang dagiti biktima.
Segun kadagiti opisial, narigat a madanon ti sumagmamano a naapektaran a lugar gapu iti kalawa ti nadadael.
Naammoan a maysa ti Afghanistan kadagiti pagilian a nakaro a maap-apektaran ti climate change wenno panagbalbaliw ti klima.
Inpakaammo dagiti eksperto a masansan itan a makapaspasar ti napigsa a panagtudo ken panaglayos kadagiti sumagmamano a paset ti pagilian.
Kabayatanna, ti makitkita a rason ti nakaro a panaglayos ket ti panagpukan dagiti kayo iti kabanbantayan.
