LAOAG CITY – Nakairekord ti South Korea ti kangatoan a temperatura iti pakasaritaan kalpasan nga immabot iti sumurok 41 degrees Celsius ti kinabara ti panawen gapu iti nakaro nga heatwave.
Basar iti Korea Meteorological Administration (KMA), naartapanna ti dati daytoy a national record a 41.0 degrees Celsius a nairekord idi 2018.
Tallo a nagsasaruno nga aldaw a lumablabes ti 40 degrees Celsius ti temperatura iti Yangsan gapu iti nakaro nga heatwave a mapaspasaran iti dakkel a paset ti pagilian.
Gapu iti daytoy, inyetnag ti Korea Meteorological Administration ti kangatoan a tukad ti heatwave warning kadagiti sumagmamano a lugar iti South Gyeongsang Province idinto a nagtalinaed dagiti pakdaar iti intero a pagilian.
Naammoan a ti nakaro a kinapudot ti paniempo ket gubuay iti panaggiddan ti North Pacific High ken Tibetan High pressure systems a mangbalbalkot iti nabara nga angin ken manglaplapped iti pannakabukel kadagiti ulep.
Kabayatanna, agtultuloy a banbantayan dagiti otoridad ti Typhoon Dolphin a mabalin a makaapektar iti sasaaden ti panawen iti Korean Peninsula inton sumaruno a lawas nupay saan pay a sigurado no makissayanna ti mapaspasaran a nakaro a kinabara ti panawen iti pagilian.
