LAOAG CITY – Mamati ni Kamanggagawa Partylist Rep. Eli San Fernando nga adda ti pakainaigan ti sumagmamano a nangangato nga opisial ti Malakanyang ken dagiti dadakkel a negosio iti panangsuspenso ti Pasig City Regional Trial Court (RTC) iti ₱85 minimum wage increase idiay Metro Manila.
Inpetteng ni San Fernando a saan a maaddaan ti napigsa a pakinakem ti korte tapno labsingen dagiti probision ti Labor Code no saan daytoy a suportado ti Malakanyang ken dadakkel a grupo dagiti negosiante.
Nakaam-amak para ken ni San Fernando ti kastoy a nakaro a pressure manipud iti ngato ti bassit a nayon iti sueldo para iti ordinario a mangmangged iti National Capital Region (NCR).
Inpasigurado ni San Fernando a saanda nga agsardeng a kwestionaren iti hudikatura tapno iyimot ti nakabasbassit a nam-ay nga ipaay ti wage increase.
