LAOAG CITY – Agturong ita nga aldaw iti oras ti alas nuebe ti bigat iti Korte Suprema ti Akbayan Party-list kaduana ti sumagmamano a leader dagiti mangmangged.
Inbatad ni Akbayan Party-list Representative Perci Cendaña a mangisubmitirda iti Korte Suprema ti surat kas panagapela kontra iti Temporary Restraining Order (TRO) nga inparuk-at ti Pasig Regional Trial Court (RTC) Branch 152 a manglaplapped iti implementasion ti ₱85 daily wage hike iti National Capital Region (NCR).
Inpetteng ni Cendaña a ti Temporary Restraining Order iti nayon a sueldo ket mailabsing iti Labor Code, partikular iti Article 126 a mangibagbaga a saan a mabalin a lapdan ti korte wenno aniaman nga entity ang proceedings iti National Wages and Productivity Commission ken dagiti Regional Tripartite Wages and Productivity Boards (RTWPB).
Kunana nga iti babaen ti Konstitusion ket addaan ti administrative supervision ti Korte Suprema iti amin a korte ken court personnel isu a mabalin daytoy nga imbestigaran dagiti hues gapu iti misconduct, gross ignorance of the law, undue delay, bias, corruption ken dadduma pay nga administratibo a panaglabsing.
Dinakamat ni Cendaña a kas simbolo ti apelada ket mangipakita ti Akbayan ken dadduma pay a grupo dagiti mangmangged ti “love letter” postcards nga addaan ti mensahe ti panagpakaasi iti Korte Suprema nga ikanlintegan ti takder dagiti mangmangged gapu ta arig napaay ti puso dagitoy gapu iti Temporary Restraining Order iti wage increase.
