LAOAG CITY – Nagpanawagan ni Senate Committee on Energy Chairperson Senador Erwin Tulfo kadagiti electric distribution ken generation companies a makitinnulong ti pagannurotan nga ikkaten ti system loss charge kadagiti electric bill dagiti consumer ken ipakita ti social responsibility-da.
Segun ken ni Sen. Tulfo, saan a nainkalintegan nga ipasa kadagiti ordinario a Pilipino ti system loss kabayatan a makapaspastrek ti binilyon a pisos dagiti kompania ti kuryente.
Inbatadna a target-na a malpas ti panagdengngeg ti Committee on Energy sakbay nga nga agngudo ti tawen tapno matalantan dagiti reporma a mangipawil iti panangipasa ti system loss charge kadagiti consumer.
Inlawlawagna a dakkel a nam-ay para kadagiti pamilia a Pilipino ti sumagmamano a gasut a pisos a mainot iti kada buwan gapu ta mabalin daytoy a paggatang ti bagas, gasolina ken dadduma pay a kangrunaan a kasapulan.
Inpetteng ni Tulfo a masapulen a maamendaran ti sumurok 25 a tawen nga Electric Power Industry Reform Act (EPIRA) tapno maipatungpal ti gagem daytoy a makaipaay ti nalaklaka a kuryente iti publiko.
Mainaig iti daytoy, inpasa ni Tulfo ti Senate Resolution No. 537 a gagem nga imbestigaran ti pagannurotan ti panangipasa ti system loss charge kadagiti konsyumer, Senate Bill No. 2239 a gagem a mawaswas ti bileg ti BP 36 wenno Energy Tax Law ken Senate Bill No. 2340 a mangikkat ti Value-Added Tax (VAT) iti system loss charges.
Innayonna a mangnamnama daytoy a mailungalong dagitoy a gakat iti tulong ti suporta ti administrasion tapno mapalag-an ti padagsen dagiti consumer iti ngumatngato a singir iti kuryente.
