LAOAG CITY – Inbinsa-binsa ni Governor Cecilia Araneta Marcos dagiti kalikagum ken dagiti naipatungpal nga addang ti probinsia bayat ti naisayangkat nga State of the Province Address-na iti Ilocandia Cultural Center.
Mainaig iti daytoy inyibbatna dagiti kalikagumna iti probinsia kas iti pannakaipangato ti sueldo dagiti government employees ken ti pannakai-regular dagiti job orders ditoy probinsia.
Impakaammo pay ti gobernadora ti Wellness Policy no sadinno ket maipaayan ti gundaway dagiti empleado ti gobierno probinsial tapno makapag-leave wenno makapag bakasion.
Malaksid iti daytoy, dinakamat pay ni Governor Marcos iti SOPA-na ti pannakaestablisar dagiti kanayunan pay nga opisina no sadinno ket babaen iti daytoy ket ad-adda a makatulong iti biang dagiti residente para iti pannakaipaay ti ad-ado pay a serbisio ditoy probinsia.
Innayonna pay nga iti biang iti turismo ket naikkan ti gundaway dagiti estudiante manipud kadagiti nagduduma a local a gobierno a makapasiar kadagiti tourist spots ken kadagiti nagduduma a lugar.
Malaksid kadagitoy, dinakamat pay ti Gobernador ti Media Incentiveness no sadinno ket babaen iti daytoy, matulungan dagiti ilokano filmmakers para iti kanayunan a suporta a maipaay kadakuada.
Inpetteng na pay dagiti nagbalin a mission dagiti Micro Small and Medium Enterprises idiay Estados Unidos no sadinno ket binaggkatda dagiti produkto manipud ditoy probinsia tapno itagilako idiay ballasiw taaw.
Innayon pay ni Marcos dagiti nagbalin nga investments ti benneg ti salun-at pakairamanan ti pannakaibaba dagiti presio ti agas ken idinto a nagbalin pay a balligi dagiti aktibidad ti probinsia iti biang met ti transportasion ken ti edukasion.
Kabayatanna, kalapasan ti nagbalin nga State of the Province Address ti gobernadora ket inbatadna a manamnama a pannakitarpinongna ken ni Presidente Ferdinand Marcos Jr.
