LAOAG CITY – Saan nga umannugot ni Mrs. Cathy Estavillo, pannakangiwat ti maysa nga alyansa a Bantay Bigas iti manamnama a panangipasdek ti gobierno ti Pax Silica project ditoy pagilian.
Saanna a maipeksa ti ungetna gapu ta daytoy nga Artificial Intelleigence Hub ket manamnama a pkaipadekan kadagiti daga dagiti mannalon a paggapgapuanan ti pagsapulanda.
Segun kenkuana, saan nga umno a dagiti manipud kiti sabali pagilian ti naruay a mabenepisiaran kadagiti daga ken idonto a dagiti lokal a mannalon ket maawananda ti pagtaengan ken pagsapulan.
Inbatad ni Mrs. Cathy a ti nasao nga Pax Silica project ket agarup masapolna ti 1,620 nga ektaria a daga a ti kayat na a saoen, ado dagiti mannalon ken Indigenous People a mapektaran.
Malaksid iti daytoy, masapol pay ti nasao a proyekto ti minilyon a litro ti danum iti kada aldaw tapno makapag-operate a segun kenkuana, saan a kaya ti pagilian a makaptaud ti minilyon a litro a danum iti kada aldaw gapu ta iti agdama, addan dagiti mannalon ti agpanpanawagan ti kinakurang ti danum kadagiti talonda.
Ket no matuloy ti pannkaipasdek ti Pax Silica project ket ad-adda a makaapektar daytoy saan laeng kadagiti mannalon no diketdi kadagiti tao a gumatgatang kadagiti makan a taltalunenda.
Gapu iti daytoy, kinunana a dakkel a saludsod para kadagiti Pilipino no sadino ti paggapuan ti mausar a danum gapo iti kanayunan mapaspasaran nga El Niño ditoy pagilian.
Inpettengna a ti plano ti gobierno a mangipasdek ti rain-catch water system ket saan nga umanay iti inaldaw a danum a kasapulan ti nasao a proyekto.
Gapu iti daytoy, inpanagetgetna a saan a masapol ti pannakaituloy ti panangipasdek ti Pax Silica project ditoy pagilian gapu ta malaksid iti pannakaapektarna daytoy kadagiti talon dagiti mannalon ket mabalin a maapektaranna pay ti suplay ti danum kadagiti babbalay.
