LAOAG CITY – Agtultuloy ti panangipaay ti City Health Office (CHO) ditoy siudad ti Laoag kadagiti serbisio para kadagiti biktima ti animal bite babaen ti Animal Bite Treatment Center (ABTC).
Segun ken ni Dr. Rodrigo Catcatan, kanayon a napno ti Animal Bite Treatment Center gapu iti kaadu dagiti kaso ti animal bite iti siudad.
Nupay kasta, impasiguradoda a bayat ti kinado dagiti pasiente ti animal bite ket maipaay latta kadakuada dagiti kasapulan a serbisio ken bakuna para kadagiti pasiente.
Imbatadna a maib-ibusen ti supply ti anti-rabies vaccine, ngem adda metten iti panag-request dagitoy a panag-gatang para iti maika-dua a semester tapno mapagtalinaed ti naan-anay a suplay para kadagiti agkasapulan.
Mainaig iti daytoy, inlawlawag pay ni Dr. Catcatan a PhilHealth-accredited ti Animal Bite Treatment Center, ngem dagiti kaso laeng nga maikonsidera ket dagiti Category 3 animal bite ti masakupan iti reimbursement ti PhilHealth.
Ti Category 1 ket dagiti awan ti makita a sugat wenno pakailasinan ti pannakagat.
Ken idinto a ti Category 2 ket dagiti adda scratch-na wenno bassit a sugat manipud iti pannakagat ken ti Category 3 ket dagiti sugat a nagdara, dakdakkel a sugat a masapul ti pannakaidait, wenno uray bassit nga scratch wenno kagat iti ulo, rupa ken tengnged.
Kabayatanna, nagballaag ni Dr. Catcatan iti publiko a dagus a mapan iti Animal Bite Treatment Center no makagat tapno insigida a malapdan ti peggad ti rabies.
