LAOAG CITY – Inpakaammo ni Dr. Melvin Manuel, mangidadaulo ti City Disaster Risk Reduction and Management Office ditoy siudad ti Laoag nga awan ti nagibakwit a residente kadagiti evacuation center kabayatan iti iduduprak ti Bagyo Maymay ditoy probinsia.
Segun kenkuana, nakapasar ti siudad ti nakapsut agingga kalalainganna ti panagtudo itay parbangon ita nga aldaw ti Huebes, Agosto 6.
Inbatadna nga awan ti nalayus a lugar ken awan met ti dakes a napasamak iti siudad gapu ta saan unay a napigsa ti angin ken gagangay laeng ti dalluyon ti baybay.
Inlawlawagna a saan kas idi dimmuprak ti Bagyo Kiyapo ditoy siudad ket awan dagiti nai-report a mangngalap a napan timmapog iti baybay iti baet ti dakes a panawen.
Kunana a malaksid iti City Disaster Risk Reduction and Management Office (CRMMO) ket timmulong met a nag-monitor dagiti dadduma nga opisina ken ahensia kas ti General Services Office, City Health Office, City Social Welfare and Development (CSWD), Engineering Office, Bureau of Fire Protection, Philippine Coast Guard ken dadduma pay pakairamanan ni Mayor James Bryan Alcid.
Kabayatanna, kuna ni Manuel a nakasaganada iti aniaman a sasaaden ti siudad no sadinno adda dagiti water assets ken land assets a mausar tapno agresponde ti aniaman a pasamak.
