LAOAG CITY – Umaboten iti P135.3 million a gatad ti nairekord a perdision ken lugi iti sektor ti agrikultura bayat ti panagdalyasat dagiti naglabas a bagyo Maymay, Bagyo Luis ken Hangin Habagat.
Basar iti agtultuloy a damage assessment dagiti regional offices ti Department of Agriculture (DA), nairekord dagiti perdision iti agrikultura iti Ilocos Region, Central Luzon, Calabarzon, Mimaropa ken Western Visayas no sadinno ket naapektaran ti 4,000 nga ektarya ti agricultural areas.
Mainaig iti daytoy, nairekord ti naruay a perdision ken pannakalugi kadagiti commodities kas ti bagas, mais, high-value crops, livestock ken poultry, kasta payen dagiti pasilidad iti irigasion, makinarya ken equipment.
Gapu iti daytoy, inbatad ti Department of Agriculture a mabalin nga ag-avail dagiti naapektaran a mannalon ti P106.5 million a gatad ti farm inputs kas ti bagas, mais, bin-i ken dagiti dadduma pay a nadadael a mulada.
Malaksid iti daytoy, mabalin pay nga ag-avail dagitoy ti agdagup P25,000 loan manipud iti Survival and Recovery Loan Program ti Agricultural Credit Policy Council.
