LAOAG CITY – Naan-anayen a linteg ti Republic Act No. 12322 a mangipaay iti Department of Education ti bileg nga agpili ti wagas ti panangisuro kadagiti pampubliko ken pribado a pagadalan iti basic education.
Nagbalin a linteg ti gakat kalpasan a nag-lapse daytoy into law idi Agosto 2, 2026.
Iti babaen ti linteg, saanen nga agtalinaed ti Department of Education iti maymaysa a wagas ti panangisuro imbes ket mabalinen nga agpili ti wagas nga ad-adda a maiyannatop tapno al-alisto a makasursuro dagiti estudiante.
Binaliwan pay ti linteg ti Enhanced Basic Education Act of 2013 a dati a mangikedkeddeng ti panagusar ti spiral progression approach iti panangisuro.
Inbilin pay ti Department of Education a baliwan ti curriculum ken wagas ti panagisuro iti kada lima a tawen tapno masigurado nga epektibo latta dagitoy.
Agbalin nga epektibo ti linteg 15 nga aldaw kalpasan a maipablaak iti Official Gazette wenno iti maysa a pagwarnakan nga addaan ti nalawa a sirkulasion.
