LAOAG CITY – Limmabesen iti 4,000 ti nakumpirmaran a kaso ti Ebola idiay Democratic Republic of Congo (DRC) kalpasan ti panangiparuk-at ti datos ti gobiernoda.
Iti agdama, nairekord ti 4,053 ti pakabukelan a kaso, pakairamanan ti 1,850 a natay no sadinno ket daytoyen ti maika-dua a kadakkelan nga Ebola outbreak iti intero a lubong.
Segun kadagiti eksperto, nangrugi ti panagwaras ti nasao a virus kalpasan a naideklaerar ti outbreak idi Mayo 15 no sadinno ket mamatida a nangatngato pay ti agpayso a bilang dagiti positibo kumparar iti datos nga adda kadakuada.
Basar met iti report ti journal Science, mamatida a nangrugi ti outbreak idi Enero wenno nasapsapa pay idiay Ituri a nakairekord ti sumurok 500 a kaso sakbay pay ti nasao a deklarasion.
