LAOAG CITY – Agtultuloy a makaapektar ti habagat iti sumagmamano a paset ti Luzon ngem manamnama a kumapsoten daytoy kadagiti sumaruno nga aldaw basar iti forecast ti state weather bureau.
Inbatad ni weather specialist Chenel Dominguez a manamnama latta ti napigsa a tudo gapu iti habagat iti Luzon partikular idiay Zambales, Bataan ken Occidental Mindoro.
Basar iti 24-hour heavy rainfall outlook, adda ti tallo a lugar ti posible a makapasar ti 100 agingga 200 millimeters a panagtudo isut gapuna a naiballaag ti posible a panaglayus ken panagreggaay ti daga.
Makapasar ti naulep a tangatang idiay Metro Manila, Calabarzon, dakkel a paset ti Central Luzon, Benguet, Pangasinan ken Camarines Norte.
Manamnama a sumayaat ti sasaaden ti panawen iti nabatbati a lugar iti Luzon.
Kabayatanna, adda latta ti panagtudo gapu iti habagat idiay Palawan ken adda ti tsansana a localized thunderstorms iti malem ken rabii a posible a mapasaran iti Visayas ken Mindanao.
Naammoan a kadagiti sumaruno nga aldaw ket manamnama nga agtultuloy a kumapsoten ti habagat ken makapasar ti napintas a sasaaden ti panawen ti dakkel a paset ti pagilian.
