LAOAG CITY – Mamati ni Palace Press Officer Usec. Claire Castro a saan nga umno ti panagusar ti misleading questions iti cross-examination gapu ta mabalinna daytoy a maimpluwensiaan ti sungbat ti testigo.
Daytoy ti nagbalin a rakurak ni Castro kalpasan ti nabara a panagsinnungbat da Atty. Lorna Kapunan ti prosecution ken Atty. Kristine Ferrer ti depensa maipanggep iti wagas ti panagsaludsod iti testigo.
Kinontra ni Kapunan ti sumagmamano a saludsod ni Ferrer gapu ta kunana a misleading dagitoy.
Inlawlawag ni Castro a nasken a saan nga agtalinaed ti “wen” wenno “saan” ti testigo no kasapulanna nga ilawlawag ti sungbatna.
Saan met a binabalaw ni Castro no istratehia ti depensa ti kastoy a wagas ti panagsaludsod ken iresrespetarna ti istilo ti tunggal abogado.
Nupay kasta, inpettengna nga agbalin a naannad dagiti abogado iti tunggal saludsod ken rakurak iti korte gapu ta mabalin a mangitunda daytoy ti saan nga umno nga interpretasion.
No adda ti biddot wenno saan a nalawag a rakurak, inbatad ni Castro a nasken daytoy nga insigida a lawlawagan ti mismo nga abogado.
