LAOAG CITY – Kalikagum ti Pilipinas ken Japan ti pannakaileppas ti maritime boundaries dagiti dua a pagilian.
Segun ken ni Presidente Ferdinand Marcos Jr., nasken ti panagkinnaawatan dagiti dua a pagilian mainaig iti eksakto a pagpatinggaanan ti kabaybayan a sakupen ti Pilipinas ken Japan.
Mainaig iti daytoy, awan ti makitkita ti Presidente a rason a saan a pagkinnaawatan ti Pilipinas ken Japan iti negosasion no sadinno ket mamati isuna ti pannakaikumpleto ti proseso iti kabiitan a panawen.
Kabayatanna, mainaig iti saan a panagsang-ayon ti China, inbatad ti Presidente a bilateral daytoy ti Pilipinas ken Japan.
Nupay kasta, silulukat dagiti dua a pagilian a denggen ti agbalin a rakurak dagiti sabali nga stakeholder.
