LAOAG CITY – Inrakurak ni Senate President Sherwin ”Win” Gatchalian a suportadona ti plano a Pax Silica Industrial Hub ngem inpettengna a kasapulan pay laeng a masolbar ti sumagmamano a kondision sakbay daytoy a maipatungpal.
Iti panagdengngeg ti Senado, inbatad ni Gatchalian nga adda dagiti peggad ken kondision ti dakkel a proyekto a nasken a pagsaritaan ken siguradoen a maprotektaran ti interes ti pagilian.
Segun iti Senador, napateg a matagiben ti karbengan dagiti lokal a komunidad a mabalin a maapektaran ti proyekto, partikular dagiti residente idiay Tarlac.
Kunana a masapul a siguradoen ti umdas ken natibker a suplay ti danum ken kuryente para iti operasion ti industrial hub.
Inpetteng ni Gatchalian ti kinapateg ti technology transfer tapno saan laeng a dagiti gangannaet a kompania ti mabenepisiaran ti proyekto no diket maaddaan pay ti gundaway dagiti Pilipino a makasursuro ken makaala ti nangatngato a tukad ti padas.
Inladawanna ti Pax Silica kas posible nga agbalin a dakkel nga addang iti panagbalbaliw ti industria iti pagilian.
Kabayatanna, sumagmamano nga environmental groups ti nangipeksa ti panangkontrada iti proyekto gapu iti panagamak a maaddaan daytoy ti epekto iti aglawlaw ken mangitunda ti displacement iti sumagmamano a residente idiay Tarlac.
Kuna ni Gatchalian a kasapulan nga agbalin a balansen dagiti oportunidad nga itunda ti proyekto ken ti posible a peggad daytoy sakbay a naan-anay a maipatungpal.
