LAOAG CITY – Paim-imbestigaran ni Senador Imee Marcos iti maiyannatop a komite ti Senado ti epekto iti pagilian ti Pax Silica agreement.
Iti Senate Resolution 547 nga inpasa ti Senadora, paim-imbestigaranna ti “in aid of legislation” ti manamnama a panagngato ti demand iti resources ti danum ken kuryente ken nabayag nga epekto iti aglawlaw ti Pax Silica a plano nga ipasdek idiay New Clark City, Capas, Tarlac.
Ti Pax Silica ket inisyatibo manipud iti Estados Unidos a mangilunglungalong ti artificial intelligence (AI) ken panag-secure dagiti usaren iti supply chain security kas kadagiti semiconductors ken rare earth elements.
Nakailanad iti resolusion a ti kadakkelan a concern dagiti environmental ken scientific organizations ket saan laeng a ti teknolohia no diket ti naruay a suplay ti danum ken dakkel a suplay ti kuryente a kasapulan para iti panagpataray ti AI data centers.
Dinakamat iti resolusion a ti AI data centers ken servers ket aggen-generate ti nakaro a pudot ken kasapulan a mapagtalinaed ti lamiis dagiti kagamitan ken natibker a suplay ti power iti sibubukel nga aldaw.
Ti Pax Silica hub ket agkasapulan ti 130 million litro a danum iti kada aldaw a katukad ti suplay iti 600,000 households ken 3 gigawatts ti kuryente a katukad met ti 16 a porsiento ti Luzon grid capacity.
Pagam-amkan a gapu iti daytoy ket posible nga agkurang ti suplay ti danum ken kuryente iti pagilian, maapektaran ti pagsapulan dagiti mannalon, panagbagsak ti food security, pannakadadael ti aglawlaw ken ad-adda pay a kumaro ti climate-related risks.
