LAOAG CITY – Inbilin ti Philippine National Police (PNP) dagiti police commander iti intero a pagilian a paigetan ti panangipatungpal iti umno a waste segregation ken disposal kas paset iti panangsolbar ti gobierno iti kumarkaro a problema iti basura.
Inbatad ni Philippine National Police chief Police Gen. Jose Melencio Nartatez Jr. a nasken nga agbalin a pagwadan dagiti pulis iti panagpatalinaed ti kinadalus kadagiti opisina ken komunidad dagitoy.
Kunana a nasken a mangrugi mismo kadagiti police office ken unit ti umno a panagibelleng ken panagsinasina kadagiti basura.
Sakup ti pammilin ti amin a police office ken unit pakairamanan dagiti precinct, police station, municipal ken city police station.
Nabilin dagiti commander a siguradoen nga adda ti agsina a pagibasuraan para iti biodegradable ken non-biodegradable waste.
Kuna ti Philippine National Police a suportaranna ti panawagan da Presidente Ferdinand Marcos Jr. ken Interior Secretary Jonvic Remulla para iti naig-iget a panangipatungpal kadagiti addang kontra iti problema iti basura.
Kabayatanna, inkari ni Nartatez a tumulong ti nailian a pulisia kadagiti lokal a gobierno iti panangipatungpal kadagiti ordinansa mainaig iti umno a panagibelleng ti basura.
