LAOAG CITY – Inpasigurado ni Executive Secretary Ralph Recto a padakkelen pay ti administrasion ni Presidente Ferdinand Marcos Jr. ti pondo ken suporta para kadagiti lokal a gobierno tapno mapaalisto iti pannakaipatulod ti serbisio iti publiko.
Inbatad ni Recto nga umabot ti agdagup P1.4 trillion ti National Tax Allotment (NTA) dagiti local government unit (LGU) iti 2027 a kadakkelan iti pakasaritaan ti pagilian.
Mainaig iti daytoy, P448.70 billion ti maiyalokar iti 1,491 nga ili kabayatan a P303.56 billion ti mailatang kadagiti probinsia, P263.97 billion kadagiti barangay ken ti nabatbati ket mailatang kadagiti siudad.
Malaksid iti daytoy, mailatang ti P58.53 billion para iti Local Government Support Fund (LGSF) iti babaen ti gakat ti 2027 national budget. Daytoy ti kadadakkelan nga alokasion para iti Local Government Support Fund (LGSF).
Basar ken ni Recto, usaren ti pondo para kadagiti proyekto kas ti kalsada, farm-to-market roads, water systems, health facilities ken dagiti pasdek a mabalin kas evacuation centers.
Pakairamanan pay ti programa a supsuportaran ti Local Government Support Fund (LGSF) ket ti distribution ti 10 a kilo ti libre a bagas iti kada dua a bulan iti agarup 8 million a pamilia.
Kunana a pinasimple ti gobierno ti proseso ti panagkiddaw ti Local Government Support Fund (LGSF) tapno makissayan ti requirements ken mapaalisto ti panangiruar ti pondo.
Impasiguradona nga ad-adda a palawaen ti gobierno ti suporta kadagiti local government unit (LGU) nga addaan dagiti programa nga epektibo a makatulong kadagiti umili.
