LAOAG CITY – Inlungalong ni Senador Erwin Tulfo ti panangipaay ti 20% discount iti internet ken load para kadagiti Pilipino nga agad-adal nangruna ket agsasaruno ti panagakar iti online class iti agdama gapu iti agtultuloy a panagtudo.
Iti Senate Bill 2275 wenno ti “Student Load Discount Act” nga inpasa ni Tulfo, gagem a tulungan dagiti estudiante ken dagiti pamilia a kissayan ti problema dagitoy maipanggep iti pinansial.
Iti babaen ti gakat, maipaayan dagiti agad-adal ti 20% discount iti mobile prepaid load, mobile postpaid plans ken mobile internet packages.
Sakup ti gakat ti panangipaay ti diskuento kadagiti amin nga agad-adal manipud kadagiti otorisado a pampubliko ken pribado a pagadalan iti elementaria, sekondaria, technical-vocational, higher education malaksid iti post-graduate studies.
Naammoan a tapno masigurado ti agtultuloy a panagadal, ti obligado a 20% discount ket mausar iti makatawen pakairamanan dagiti weekends ken holidays.
Kabayatanna, tapno ma-avail ti diskuento, kasapulan laeng a mangipakita dagiti estudiante ti ID iti pagadalan wenno pammaneknek ti enrollment kasta pay ti birth certificate tapno paneknekan ti panagbalin a maysa a Filipino citizen.
