LAOAG CITY – Pinaigetan ni Presidente Ferdinand Marcos Jr. ti seguridad ti amin nga ahensia a maseknan iti komunidad ti Bangsamoro Autonomous Region in Muslim Mindanao (BARMM) Interim Chief Minister Abdulraof “Sammy Gambar” Macacua ken dagiti kaduana.
Nagpanawagan ti Presidente nga agbalin a nakappia ken agtalinaed ti kinatao nga adda panangirespetar iti karbengan aglallalo iti biag ti tunggal umili.
Basar ken ni Presidential Communications Office (PCO) Undersecretary ken Palace Press Officer Claire Castro a kinondenar ti Presidente ti insidente ngem impaguradona a saan daytoy a nangpakapuy iti kalikagum ti gobierno para iti Bangsamoro Autonomous Region in Muslim Mindanao (BARMM) communities nga addaan ti naurnos a panagakar wenno panagbaliw nga agturong iti democratic government.
Immunan nga inbatad ni Macacua a saan a malappeddan ti plano a panangpatay kadaytoy manipud iti panangilungalongna ti kappia iti rehion.
Mainaig iti daytoy, naiget a kinondenar ti Office of the Presidential Adviser on Peace, Reconciliation and Unity (OPAPRU) ti panangtambang iti convoy ni Macacua iti Barangay Bitu, Datu Odin Sinsuat, Maguindanao del Norte idi Agosto 15.
Maipalagip a naisalakan ni Macacua ken dagiti kaduana ngem nataamaan ti bala dagiti tallo a luxury vehicles pakairamanan ti nagluganan ni Macacua.
Kabayatanna, nagpanawagan ni Sarmiento iti publiko nga agtalinaed a nakappia ken liklikan ti panangiwaras ti ispekulasion wenno insigida nga itudo ti responsible ken ipaima ti imbestigasion kadagiti otoridad.
