LAOAG CITY – Manamnama nga umabot iti P5.5 trillion ti pakabuklan a koleksion ti gobierno inton malpas ti termino ni Presidente Ferdinand Marcos Jr. inton 2028.
Basar ken ni Finance Secretary Frederick Go, manamnama a dumakkel ti average a 9% ti kada tawen ti tax collections manipud idi 2026 agingga 2028.
Naamoan nga inton 2030, target ti gobierno nga aglabes iti P6 trillion ti pakabuklan a revenue ti gobierno.
Gapu iti daytoy, manamnama nga ad-adda a paigetan ti Bureau of Internal Revenue (BIR) ken Bureau of Customs (BOC) ti panangkolektarda ti tax.
Maipalagip nga idi maikalima nga State of the Nation Address (SONA), insingasing ni Presidente Marcos nga ingato ti income tax exemption ceiling para kadagiti income-na nga agingga P350,000 iti kada tawen manipud iti manarimaan a P250,000.
Innayonna pay nga aramiden nga exempted ti micro ken small businesses iti 2% minimum corporate income tax iti uneg ti 12 a bulan.
Kabayatanna, namnamaen ti Department of Finance (DOF) kadagiti gakat kas ti Multinational Minimum Tax Bill ken General Tax Amnesty Bill ket manayonan ti koleksion ti gobierno.
Nupay kasta, nangrugi ti Department of Finance ken ti Bureau of Internal Revenue iti panagaramid ti linted tapno maipatungpal ti Global Minimum Tax a gagemna a lappedan ti panagakar ti taxable income ti dadakkel a kompania iti sabali a pagilian.
Naamoan a manipud idi Enero agingga Hulio 2026, nakakolektar ti Bureau of Internal Revenue ti P2.003 trillion, nangatngato daytoy ngem ti P13.53 billion wenno 0.68% kumparar iti P1.990 trillion a target para iti nadakamat a panawen.
