LAOAG CITY – Naminsan manen a nakiddaw ken ni Presidente Ferdinand Marcos Jr. ti Senior Citizens Party-List nga ikkan ti importansia ti dua a napapateg a gakat kabayatan a sibibiag pay dagiti natataengan a mabenepisiaran kadagitoy.
Daytoy ket kalpasan nga awan ti nadakamat iti State of the Nation Address wenno SONA ti Presidente a konkreto a plano para kadagiti senior citizens.
Inladawan ni Rep. Rodolfo “Ompong” Ordanes ti takderna iti bulong ti anahaw nga idi ket agserserbi daytoy a paglinong iti tudo ngem iti panagtulid ti panawen ket naiwalinen gapu iti panagusar ti payong.
Nupay kasta, insigida nga inlawlawag ni Ordanes a saan a nasakit ti nakem dagiti senior citizens ken ni Marcos Jr. gapu ta agtultuloy a mangnamnamada a mapagbalin a linteg ti Universal Social Pension ken ti Geriatric Health Act iti kabiitan a panawen a panangbigbig kadagiti sakripisio ken aramid ti tunggal natataengan a Pilipino.
