LAOAG CITY – Impasigurado ni Presidente Ferdinand R. Marcos Jr. a saan a paglikodan ti pagilian ti 2016 Arbitral Award a nagpaawan ti bileg iti nine-dash-line claim ti China ken nangbigbig iti sovereign rights ti pagilian iti babaen ti United Nation Convention on the Law of the Sea (UNCLOS).
Iti maikalima nga State of the Nation Address-na (SONA), kunana nga usaren ti gobierno iti amin a nakappia ken legal a wagas tapno salakniban ti ruling kontra iti aniaman a panggep a mangpakapuy iti daytoy.
Mainaig iti daytoy, nirambakan ti pagilian idi Hulio 12 ti maika-10 nga anibersario ti arbitral ruling no sadinno nga inladawan ni Marcos kas maysa a “definite benchmark for the interpretation and application of the UNCLOS.”
Binigbigna pay dagiti miembro ti Armed Forces of the Philippines ken Philippines Coast Guard, pakairamanan dagiti Pilipino a mangmangged, iti agtultuloy a panag-patrol-da ken panagsarak ti panggedan iti West Philippine Sea bayat dagiti risgo.
Dinepensaan ti Presidente dagiti umili kontra iti nabiit pay a panangbabalaw nga inpakita ti Chinese state media a mangiladladawan kas “monkeys’ dagiti Pilipino sumagmamano nga aldaw sakbay ti anibersario ti arbitral ruling.
Kabayatanna, agpanpanawagan ni Marcos kadagiti umili nga agkaykaysa kabayatan ti agtultuloy a sangsangoen ti pagilian a pangta ti seguridad.
