LAOAG CITY – Nangiparuk-at ti rakurak ti aktor a ni Derek Ramsay maipanggep iti pannakairaman ti nagan na iti isaysayangkat nga imbestigasyon ti Land Transportation Office (LTO) mainaig iti maysa a supercar a nakita nga agus-usar ti maipagarop a peke a plaka wenno plate number.
Iti Instagram Story, inbatad ti aktor nga ammo na ti isyu ken inlawlawag na a saan nga agmanmaneho ti aniaman a behikulo a peke ti plaka na.
Inpetteng na nga amin a lugan na ket addaan ti usto a plate number.
Inbatad ti aktor nga awan pay ti naawat na a show-cause order manipod iti Land Transportation Office, kagiddan ti panangipasigurado na a makitinnulong kadagiti otoridad no kasapulan.
Basar kadagiti nagbalin a duktal ti Land Transportation Office, rumrumuar nga inlakon ni Derek ti lugan iti maysa a negosyante.
Nupay kasta, saan pay a naiyakar ti nagan ti gimmatang iti rehistro iti lugan isut gapuna a nakairekord paylaeng iti nagan ni Derek ti rehistrado na basar kadagiti rekord ti ahensya.
