LAOAG CITY – Inpetteng ni Senate Impeachment Court Spokesperson Atty. Reginald Tongol a karaman iti iparuk-at a ruling ni Presiding Officer Chiz Escudero mainaig iti panangiyisyu kadagiti public statements ti amin a sakup ti rule 18 ti impeachment court.
Daytoy ket mainaig iti iparuk-at a ruling ti Senate Impeachment Court maipanggep iti nagbalin a post iti social media ni Atty. Amando Ligutan ti prosecution team kontra iti depensa maipapan iti misleading question a kinontra ni Atty. Shiela Sison ti defense team.
Inbatad ni Tongol a karaman iti iparuk-at ti ruling ti amin a sakup ti rule 18 pakairamanan ti respondent a ni Vice President Sara Duterte, dagiti panel of prosecutors, dagiti abogado ti prosekusion ken depensa kasta pay dagiti senator-judges.
Likliklikan iti iparuk-at a ruling ti senate impeachment court a matalantan ti merito ti kaso ken iparipirip kadagiti abogado, respondent ken senator-judges ti nasken a talugading ken decorum.
Naammoan nga uray mangiparuk-at ti ruling ti Impeachment Court, inlawlawag ni Tongol nga agtultuloy latta ti Clerk of Court Secretariat iti panag-monitor kadagiti remarks, komento wenno rakurak nga iparparuk-at ti agsinnungbangir a grupo.
