LAOAG CITY – Nagpanawagan ti Game Developers Association of the Philippines (GDAP) a saan a pabasolen dagiti nagannak kadagiti problema iti online safety dagiti ubbing, ngem kasapulan a maikkan da ti impormasyon maipanggep kadagiti parental controls nga adda kadagiti gadget ken online platforms.
Iti panagdengngeg iti Senate Committee on Women and Children nga idaulwan ni Sen. Risa Hontiveros, inbatad ni GDAP President Ria Lu ng ado dagiti nagannak a mabalin a saan a makaammo kadagiti safety feature nga available kadagiti cellphone ken online platforms.
Segun ken ni Lu, uray responsible a nagannak ket mabalin a saanna nga igagara a ma-expose dagiti ubbing iti saan a maiyannatop a content no us-usaren da ti cellphone ti nagannak da nga awan ti naka-activate a parental controls.
Gapu iti daytoy, inlungalong na nga iprayoridad ti panangipaay ti adal kadagiti nagannak no kasanu nga usaren dagiti safety tools.
Kuna na a saan a kasapulan nga agbalin a technology expert dagiti nagannak, ngem napateg nga ammo da no kasanu a protehiran dagiti annak da iti online.
Inlungalong pay ni Lu a maaddaan ti digital literacy classes iti elementarya ken high school tapno masursuro dagiti ubbing no kasanu ti natalged ken responsible a panagusar ti internet.
