LAOAG CITY – Inbatad ni Dr. Rodrigo Catcatan, ti mangidadaulo iti City Health Office nga umaboten iti 138 a kaso ti dengue ti nairekord ditoy ciudad ti Laoag, sipud idi Enero ita a tawen.
Segun ken ni Catcatan, iti laeng kallabes ket nagturong da iti Barangay Balatong ditoy ciudad ti Laoag kalpasan a nakairekord ti nasao a lugar ti siyam a kaso ti dengue ita laeng a bolan ti Agosto.
Inlawlawag na nga iti panagturong da iti nadakamat a barangay ket nakita da iti barangay hall dagiti botelya a nakatambak a dagitoy ket magiling koma ngem saanda pay a naaramid gapu ta adda ti problema iti paggiling da.
Gapu iti daytoy, kuna ni Dr. Catcatan a nangisayangkat da ti health education ken advocacy awareness tapno maliklikan ti ad-adda a panagngato ti bilang dagiti makaptan ti sakit a dengue.
Innayon na nga inbilin da metten iti nasao a barangay nga urnusen da dagiti nakapenpen a botelya gapu ta mabalin a pagumukan dagiti lamok a carrier ti dengue.
Mainaig iti daytoy, kuna ni Dr. Catcatan a nasursur da met aminen dagiti pagadalan ditoy ciudad ti Laoag tapno makita no adda dagiti possible a pagitlogan ken pagumukan ti lamok a carrier ti dengue.
Inpakaammo na pay a dagiti nakairekordan ti kaso ti dengue ket nakaisayangkat da metten ti fumigation.
Kabayatanna, nagpalagip ni Dr. Catcatan a dagiti sakit nga agraira kadagitoy ket mabalin a maliklikan babaen iti panagtalinaed iti uneg ti balay iti panawen ti tudtudo tapno saan a mai-expose kadagiti kontaminado a danom.
