LAOAG CITY – Napaneknekan manen ti pagsasao a no gasat ti mangabak ti lotto ket maiturong latta iti lugar a mabalin a pangabakan ti maysa a tao.
Daytoy ti napasamak iti agasawa manipod iti Michigan, agsipud ta iti panagawid da manipod iti nagbakasyonan da ket nagsardeng da iti maysa a gas station iti Standish tapno laeng agpagasolina.
Nupay kasta, kabayatan ti pannakipila ti agtawen ti 64 a lalaki tapno agcash-out ket adda ti nasaruno na a gimmatang ti naruay a lottery ticket, rason a naallukoy met a gimmatang ti dua a Detroit Tigers tickets para iti bagina idinto a nangala met ti dua a Cashword tickets para iti asawa na.
Apaman a nakasangpet dagiti agasawa iti balay da ket ditoyen nga in-scratch da ti ginatang da a ticket a nangitunda ti panangabak da ti $500,000.
Inbatad ti saanen a nainaganan a lalaki a namin-ado da nga in-check iti asawa na ti numero a nangabakan na agsipud ta idi damo ket saan da pulos a mamati a nangabak dagitoy, ken daytoy ti kaunaan a gundaway a gimmatang da ti lottery ticket.
