LAOAG CITY – Umaboten iti sumurok 9,500 a classroom iti intero a pagilian ti nadadael gapu iti napigsa a southwest monsoon wenno habagat ken dagiti naglabas a bagyo, basar iti Department of Education (DepEd).
Basar iti kaudian nga assessment ti Department of Education (DepEd), 1,594 a pagadalan ti naapektaran kabayatan nga adda iti 9,597 a classrooms ti nagsagaba ti minor agingga major damage.
Naamoan a ti kadakkelan a nadadael ket iti Central Luzon no sadinno 3,596 a classrooms iti 412 a pagadalan ti naapektaran.
Umabot met iti 126,584 learners iti rehion ti naapektaran dagiti panagtudo ken panaglayus.
Iti Central Luzon, ti Pampanga ti kaadoan a bilang ti nadadael a classrooms nga immabot iti 1,689, sumaruno iti Bulacann nga addaan ti 933.
Segun ken ni Education Secretary Sonny Angara nga ti kangrunaan a prioridad ti ahensia iti agdama ket ti kinatalged dagiti estudiente ken mangisursuro kabayatan nga ikag-kagumaanda nga makissayan ti epekto ti kalamidad iti panagadalda.
Maipagarup nga agkasapulan ti ahensia ti kangrunaan a P318.01 million para iti minor repairs ken cleanup ti 1,594 a naapektaran a pagadalan.
Iti Central Luzon, dumanon iti P109.71 million ti masapol a gatad, pakairamanan ti P12.69 million para iti debris cleanup ken sanitation ken P97.02 million para iti minor repairs ti 1,980 a classrooms.
Mainaig iti daytoy, manipud iti Disaster Preparedness and Response Program ti pangalan ti pondo ti Department of Education (DepEd) ken iti special budget request iti Department of Budget and Management.
Nakikoordinar pay ti ahensia ti Department of Labor and Employement tapno mausar ti Tulong Panghanapbuhay sa Ating Disadvantaged Workers (TUPAD) iti panagdalus ken clearing operations kadagiti pagadalan.
Nupay kasta, umabot iti P2.604 billion ti kasapulan para iti major repairs ken reconstruction dagiti pagadalan iti intero a pagilian.
