LAOAG CITY – Ituloy ti Department of Education (DepEd) inton Setiembre 3 ti National Simultaneous School Safety nga agpokus iti panagsagana dagiti pagadalan iti posible nga active threat wenno panagatake iti uneg ti school premises.
Inpaganetget ni Education Secretary Sonny Angara a rumbeng nga ageddan a prioridad dagiti pagadalan ti pisikal a seguridad ken ti mental health dagiti ubbing.
Basar iti Department of Education, maisayangkat ti drill iti wagas a maitunos iti tawen dagiti estudiante ken ikonsiderar ti trauma ken mental health.
Mainaig iti daytoy, saan a mausar dagiti aktwal wenno arig-pudno nga simulation ti pangta pakairamanan ti aggressor role-players, armas, simulated gunfire, pyrotechnics, graphic imagery ken artificial casualties.
Imbes ket tingitingen ken isayangkat dagiti pagadalan dagiti addang kas ti panagserra ken panag-secure dagiti entry point, naulimek a panaglimmeng iti natalged a lugar ken evacuation procedures.
Maipalagip nga immunan a saan nga intuloy ti Department of Education ti drill a naikeddeng idi Agosto 25 tapno maipaayan ti gandat ti pannakaitunos kadagiti child-centered ken trauma-informed standard.
Segun ken ni Angara a gagem ti Setiembre 3 drill a maaddaan dagiti estudiante ken personnel ti kumpiansa ken umno nga adal iti panagsungbat iti pangta imbes a buteng.
