LAOAG CITY – Makapasar ti naulep a tangatang ken mawaras-waras a panagtudo ken thunderstorms iti Luzon gapu iti southwest monsoon wenno habagat ita nga aldaw ti Martes, Agosto 25, basar iti Philippine Atmospheric, Geophysical and Astronomical Services Administration wenno PAGASA.
Basar iti state weather bureau, dua a tropical cyclone ken maysa a Low Pressure Area (LPA) ti manarimaan ti panang-monitor-da iti ruar ti Philippine Area of Responsibility (PAR).
Umuna iti daytoy ket ti Typhoon Saudel, a dati a bagyo Obet, ket adda iti kaadayo nga 1,180 a kilometro iti amiananan a daya ti Extreme Northern Luzon.
Addaan daytoy ti kapigsa ti angin nga 150 a kilometro iti kada oras ken pasaray a pumigsa agingga iti 185 a kilometro iti kada oras kabayatan nga aggargaraw daytoy nga agpaamianan a laud iti 25 a kilometro iti kada oras.
Kabayatanna, agkapkapuy kas tropical depression ti Tropical Strom Atsani nga adda iti kaadayo nga 1,760 a kilometro iti daya ti Northern Luzon.
Addaan daytoy ti kapigsa ti angin a 55 a kilometro iti kada oras ken pasaray a pumigsa agingga iti 70 a kilometro iti kada oras kabayatan nga aggargaraw daytoy nga agpaamianan a laud iti 30 a kilometro iti kada oras.
Kabayatan a ti Tropical Depression Gaenari, dati a bagyo Neneng, ket nagkapuy ken nagbalin a Low Pressure Area.
Basar iti PAGASA, nababa ti tsansa nga agbalin daytoy a tropical depression iti uneg ti sumaruno a 24 nga oras.
Nupay kasta, makapasar ti Metro Manila, Ilocos Region, Cordillera Administrative Region, Cagayan Valley, Central Luzon, Cavite, Batangas ken Rizal ti naulep a tangatang ken mawaras-waras a panagtudo ken thunderstorms gapu iti habagat.
Posible ti flash floods ken landslides gapu iti kalalainganna agingga a pumigsa a panagtudo kadagiti nadakamat a lugar.
Kabayatanna, iti nabatbati a paset ti Luzon ket makapasar ti naulep a tangatang ken isolated rain showers wenno thunderstorms.
