LAOAG CITY – Pinaayaban ti Senate impeachment court ti tallo nga agdama ken dati nga opisial ti militar tapno agtestigo mainaig iti panagusar ti Department of Education (DepEd) iti confidential funds idi 2023.
Naikeddeng a sumango inton Mierkoles, Agosto 26, da retired Col. Manaros Boransing II, Col. Magtangol Panopio, ken Maj. Gen. Adonis Bajao, basar ken ni House lead prosecutor Gerville Luistro.
Sukatanda pay laeng ni dati a Department of Education (DepEd) special disbursing officer Edward Fajarda a nagkiddaw a saan a makaatendar kadagiti panangusig kalpasan daytoy a na-stroke.
Gapu iti daytoy, dinutukan ti impeachment court ti Senate Medical and Dental Bureau a beripikaren ti kondision ni Fajarda.
Manamnama a talantanen iti testimonia ti tallo nga opisial dagiti cerfitication a maipagarup nga inusar iti liquidation ti P15 million a confidential funds ti DepEd para kadagiti informants idi 2023, idi panawen a naggeddan a nagserbi nga education secretary ni Bise Presidente Sara Duterte.
Maipalagip nga iti panangusig ti Kamara idi 2024, inbatad dagiti opisial a pirmada dagiti adda iti certifications ngem maipagarup a saanda ammo nga usaren dagitoy iti liquidation ti confidential funds.
Mainaig iti daytoy, maipagarup a nakasurat kadagiti dokumento ti P15 million a para iti Youth Leadership Seminar ngem inbatad ni Boransing a saan nga aggapu iti confidential funds ti Department of Education ti nagastos iti aktibidad.
Kabayatanna, sakbay ti testimonia dagiti opisial ti militar, naikeddeng nga ipasango ti prosekusion ni Office of the Vice President Assistant Chief of Staff Lemuel Ortonio kas hostile witness ita nga aldaw ti Martes, Agosto 25.
