LAOAG CITY – Umaboten iti P6.16 billion ti balor dagiti nadadael iti imprastraktura idinto a P2.32 billion iti agrikultura gapu iti awan sarday a panagtudtudo na nga epekto ti habagat iti pagilian.
Daytoy ti inbatad ni Office of Civil Defense (OCD) Disaster Preparedness Service director Vicente Gregorio Tomas.
Inpakaammo pay ni Tomas nga addan ti pakabuklan a 724 a lugar ti nalayos, partikular iti Ilocos Region, Central Luzon, Metro Manila, ken Calabarzon.
Innayon na nga adda metten ti pakabuklan a 110 a road sections ken 14 a rangtay ti nagtalinaed a saan a madalyasatan gapu iti landslides ken pannakadadael dagiti imprastraktura.
Mainaig iti daytoy, kuna ni Tomas nga umabot iti 677 personnel a naorganisar iti 32 teams dagiti naiwaras para iti search-and-rescue operations kadagiti umili a naapektaran ti nalawa a layos, idinto a nasurok a 20,000 personnel manipod iti nagduduma a security sectors ken lokal a gobierno ti naka-standby.
Nagtalinaed met nga umdas ti relief resources kangrunaan na dagiti food, non-food items, ken dadduma pay a tulong a maipapaay babaen ti Department of Social Welfare and Development.
