LAOAG CITY – Pagtalkan ti Department of Interior and Local Government (DILG) dagiti pribado a pagadalan ti naiget a panagbantayda kadagiti sumsumrek kadagiti pagadalan kontra kadagiti agitugtugot kadagiti armas.
Segun ken ni Department of Interior and Local Government Secretary, Jonvic Remulla, manamnama ti panangiwarasda dagiti barangay tanod kadagiti pampubliko a pagadalan para iti mandatory check kadagiti bag dagiti estudiante.
Kalikagum ti nasao nga panagtignay ti ahensia tapno saanen a maulit dagiti napasamak nga insidente ti kinaranggas kadagiti sumagmamano a pagadalan ditoy pagilian.
Malaksid iti daytoy, impakaammo pay ni Remulla ti manamnama a panangbukel ti Philippine National Police (PNP) ti Quick Reaction Force a dakkel a makatulong para iti naigiget a panagbantay ken pannakaisigurado ti kinatalged kadagiti pagadalan.
