LAOAG CITY – Impakaammo ti House prosecution panel nga addadan iti 70 a porsiento a pannakakumpleto iti panangilatangda kadagiti ebidensia para iti confidential funds article wenno Article 1 mainaig iti manarimaan nga impeachment trial kontra ken ni Vice President Sara Duterte.
Segun ken ni panel spokesperson Representative Renee Co, nabengbeng a papppapelesen a dokumento ken kadagiti testigo ti naiprisitardan iti impeachment court tapno mapaneknekan ti maipagarup naanomalia a panagusar ti Bise Presidente iti confidential and intelligence funds-na.
Mainaig iti daytoy, kalikagum ti lupon a ti pannakaileppas ti panangiprisintarda iti nasao nga artikulo inton Miyerkules, Setiembre 9, a basar iti immunan a manifestation nga impila ti prosekusion iti Senado.
Tapno mapapigsa pay ti kaso sakbay ti panagserra ti umuna nga artikulo, impasigurado ti pannakangiwat ti prosekusion ti panangiparuk-atda kadagiti kanayunan pay a testigo nga adda ammona kadagiti nagbalin a transaksion ken panagusar ti OVP iti nasao a pondo ti publiko.
