LAOAG CITY – Impasigurado ni Executive Secretary Ralph Recto a saan a maapektaran ti operasion ti Office of the President kabayatan ti 64% a kissay iti budget-na daytoy para iti 2027.
Inendorso ti House Appropriations panel ti P10.15 billion a budget iti opisina para inton sumaruno a tawen, nababa daytoy kumpaar iti agdama a P28 billion.
Segun ken ni Recto nga umdas ti pondo tapno maituloy ti pannakataripato ti operasion ti gobierno, partikular iti panagsungbat kadagiti emergency, panangipatulod ti serbisio publiko, panang-monitor dagiti programa pang-ekonomia ken panangprotehir ti national interes.
Inlawlawgna a ti gapuanan ti budget cut ket nalpasen ti panaggasto mainaig iti panag-host ti pagilian iti ASEAN Summit ita a tawen.
Kaadoan iti budget ket mapan iti Maintenance and Other Operating Expenses a P7.46 billion kabayatan nga P1.86 billion ket para iti personnel services ken P839 million para iti capital outlay.
Impasigurado ni Recto nga agtalinaed a responsible ken natalged ti Office of the President iti panagusar ti pondo.
Kunana a saan nga agkiddaw ti special treatment ti opisina para iti gakat a budget-da iti fiscal year 2027.
