LAOAG CITY – Naipilan ti Office of the Ombudsman ti kaso a plunder iti Sandiganbayan kontra ken ni dati nga speaker ken Leyte 1st District Representative Martin Romualdez mainaig iti pannakairaman na iti maipagarop a maanomalya flood control projects.
Malaksid ken ni Romualdez, karaman pay kadagiti nakasoan ket isuda dati nga Ako Bicol Partylist Rep. Zaldy Co, Joselyn Serenio ken Felicito Guevarra.
Immunan nga immapela ti kampo ni Romualdez iti Office of the Ombudsman para iti patas ken maikkan ti naan-anay nga oportunidad a mangsungbat iti aniaman a baro nga alegasyon kontra kenkuana.
Ti apela ket inaramid ni Ade Fajardo, ti legal counsel ni Romualdez kalpasan ti report a mabalin a na-pressure laeng ni dati a Department of Public Works Secretary Manuel Bonoan tapno ikonektar ti dati nga speaker iti flood control scandal.
Kiniddaw pay ti legal counsel ni Romualdez ti impormasyon mainaig kadagiti 28 a baro a testigo ti Ombudsman, pakairamanan ti aniaman nga statement da kontra iti kliyente na.
Maipalagip nga immuna a naikonektar ti dati nga speaker kadagiti maanomalya a proyekto idi Setyembre 2025 kalpasan nga inbutaktak dagiti agasawa a contractors a da Curlee ken Sarah Discaya ti nagan dagiti kongresista a maipagarop a nagdawat ti kickbacks, kabayatan ti Senate blue ribbon committee hearing.
Maysa kadagiti nadakamat dagiti agasawa a Discaya ket ni dati a Quezon City 4th District representative Marvin Rillo.
Inpakaammo met ni Curlee Discaya iti komite a namin-ado a daras a dinakamat ni Rillo ti nagan ni Romualdez kas nasinged pagayam na.
Inawagan met ni Romualdez ti alegasyon dagiti agasawa a Discaya kas “false, malicious, ken awan ti kinapudno na.
