LAOAG CITY – Inarestar dagiti otoridad ti uppat a lallaki gapu iti illegal a panagsusugal da iti Barangay Elizabeth iti ili ti Dingras.
Basar iti Philippine National Police iti ili ti Dingras, dagiti suspek ket agpapada nga addan iti umno a tawen ken residente amin dagitoy iti nadakamat a barangay.
Nakumpiskar dagiti otoridad ti maysa a set ti baraha, 4 a monoblock chair, maysa a lamisaan, P8,885.00 a maipagrop a pusta dagiti suspek, 75 a pedaso ti poker chips iti nagduduma a kolor ken maysa a black handbag.
Inbatad dagiti otoridad a nakaawat da ti report nga adda ti agsusugal iti lugar ken iti panagresponde da ket naaktwaran da dagiti suspek nga agay-ayam ti “Lucky 9”.
Iti agdama, nagtalinaed dagiti suspek iti Philippine National Police kabayatan a maiyur-uray ti pannakaipila ti kaso a panaglabsing ti Republic Act 1602 wenno illegal a panagsusugal kontra kadakuada.
