LAOAG CITY – Nagun-od ni Alexander Zverev ti maikadwa a Grand Slam singles title kalpasan nga inabak na ni Ben Shelton, iti score a 6-3, 7-6 (7-2), 5-7, 6-2, iti US Open final.
Kalpasan ti umuna a major title iti French Open ita a tawen, nagkampeon manen ti agtawen ti 29 a German ken ad-adda a napatalged ti nagan na iti world tennis.
Alisto a nakontrol ni Zverev ti umuna a dua a set kalpasan a naagaw na a dagus ti serve ni Shelton iti umuna nga ay-ayam.
Narigatan ti Amerikano a ni Shelton iti agresibo nga ay-ayam ti German.
Iti maikalto a set, nagbaliw ti taray ti laban iti panangrugi a mangipaay ti nakaro a pressure ni Shelton iti serve ni Zverev.
Naala na ti break ken naipangabak na ti set tapno biagen manen ti namnama dagiti home fans iti Arthur Ashe Stadium.
Nupay kasta, dagus a naala ni Zverev iti maikapat a set kalpasan a naaddaan ti nakapuy a service game ni Shelton agingga a nagun-od na ti kampeonato.
