LAOAG CITY – Natay ti tallo nga indibidual ken 11 nga estudiante ti nasugatan kalpasan ti pammaltog iti Banga National High School idiay South Cotabato.
Basar iti immuna nga imbestigasion manipud kadagiti otoridad, adda ti 11 nga indibidual ti nasugatan iti nasao nga insidente.
Gapu iti daytoy, insigida a naikabil dagiti biktima iti South Cotabato Provincial Hospital iti Koronadal City para iti naan-anay a pannakatamingda.
Iti agdama, agtultuloy ti clearing operations dagiti kameng ti Banga Municipal Police Station iti uneg ti pagadalan tapno masigurado ti kinatalged dagiti estudiante ken personnel ken tapno maamoan ti eksakto a bilang dagiti nasugatan ken ti kanayunan pay a detalye mainaig iti insidente.
Mainaig iti daytoy, agtultuloy met ti imbestigasion dagiti otoridad mainaig iti motibo iti pammaltog.
Gapu iti nasao nga insidente, insigida a sinuspenso ti Municipal Disaster Risk Reduction and Management Office (MDRRMO) ti klase iti amin nga antas iti intero a munisipalidad ti Banga kalpasan ti insidente.
Kabayatanna, inbatad ti Department of Education a naksagana ti ahensiya a mangipaay ti psychological first aid ken psychological support kadagiti estudiante ken personnel a nakapasar ti trauma gapu iti insidente.
