LAOAG CITY – Umaboten iti 191 a kaso ti tuberculosis ti nairekord iti City Health Office ditoy suidad ti Laoag.
Segun ken ni Dr. Rodrigo Catcatan, mangidadaulo ti City Health Office ditoy suidad, a ti kangrunaan a rason iti panagado ti kaso ket iti saan a sigod a panangpakonsultar.
Kunana a nupay ammo dagiti dadduma nga addaan da iti nasao a sakit ket mabutengda a dumalan iti x-ray wenno mapan iti balay pagagasan.
Inpakaamona a ti kangrunaan a makaalala ken maapektaran iti nasao a sakit ket dagiti senior citizen gapu ta nakapsot iti resistensia dagitoy.
Innayonna pay a ti kangrunaan a sintomas ti tuberculosis ket ti nakaro a panaguyek, panagsakit iti abaga ken dadduma pay.
Kabayatanna, kuna ni Dr. Catcatan a kasapulan ti insigida a panagpa-check-up para kadagiti makarikna kadagiti sintomas tapno saan a kumaro ken no mabaybay-an ket mabalin pay daytoy nga ipatay.
