LAOAG CITY – Umaboten iti 107,677 ti bilang dagiti indibidual nga agtawen ti 100 ken agpangato idiay Japan ita a tawen, segun iti Ministry of Health, Labour and Welfare.
Daytoy ket ti maika-56 a nagsasaruno a tawen a nairekord a panagngato ti bilang dagiti centenarians iti nasao a pagilian, no sadinno 88 a porsiento kadakuada ket babbai.
Impannakkel ti gobierno ti Japan ti naatiddog a biag dagiti residente gapu iti napintas a medikasion, nasustansia a makan ken aktibo a panagbiagda.
Nupay kasta, agtultuloy ti krisis iti demograpiya idiay Japan gapu iti nababa a birth rate ti pagilian.
Iti agdama, agarup tallo iti kada sangapulo a residente idiay Japan ti agtawen 65 ken agpangto, ken maipagarup umabot pay daytoy iti 40 a porsiento iti tawen 2070.
No man pay adda dagiti ipapaay ti gobiernoda nga insentibo ken tulong pinansial para kadagiti pamilya, agtaltalinaed latta ti pangta iti pundasion ti pagbiagan idiay Japan ti agtultuloy a panagbassit ti populasionda.
