LAOAG CITY – Linagip ti singer a ni Gary Valenciano ti dakkel a pannubok iti biagna idi inbaga ti doktor nga adda ti cancer na.
Inadmitir na a saanna nga ammo ti agbalin a reaksyon na ken ti mapasamak kenkuana.
Naamoan na ti maipanggep iti daytoy kalpasan ti heart bypass surgery na no sadinno a nasaludsud na iti Diyos no apay a nanayunan paylaeng ti sakit na.
Sakbay a naamoan ni Gary nga addaan daytoy ti cancer ket addan ti sagsagabaen na a diabetes ken saan pay a nakarekobre manipod iti idadalan na ti heart surgery.
Nupay kasta, kuna na a ti saan a nagbayag ket naawat na metlaeng ti sitwasyon na ken inpaima na lattan iti Diyos ti amin.
Naragsakan ni Gary gapu ta saan a binaybay-an ti Diyos agpapa ita.
Innayon na a ti maysa a nagyamanan ken nakaragsakan na ket saan a ti asawa ken dagiti annak na ti nakaptan ti sakit a cancer no di ket isuna a mismo.
Iti agdama ket maibilangen ni Gary kas cancer-free, ken nakunana nga iti panagpasar na ti nadagsen a sakit ket isu ti nakapaneknekan na no kasanu ti kauneg ti panagayat dagiti kameng ti pamilya na kenkuana.
