LAOAG CITY – Sumangsango iti maysa a tawen ti pannakaibalod ti maysa a restaurant owner iti South Korea gapu iti panagusarna kadagiti ngilaw kas panglaok ken dekorasion iti sumagmamano a makan.
Nagkiddaw ti prosecutors ti maysa a tawen a jail term kontra iti akin kukua ti Evett, maysa a two-Michelin-star restaurant a masarakan iti Gangnam District iti Seoul. Malaksid iti pannakaibalod, agmulta pay daytoy ti 20 million Korean won.
Maipawil ti panagusar ti ngilaw kas panglaok ti makan iti South Korea gaputa saan daytoy a karaman kadagiti 10 nga insekto nga inaprobaran ti gobierno para iti human consumption.
Kabayatanna, basar ti imbestigasion, addan ti 49,000 a ngilaw ti naangkat manipud Estados Unidos ken Thailand ti nausar ti restaurant iti uneg ti uppat a tawen. Pakairamanan ditoyen dagiti ngilaw a nagserbi kas toppings iti ice cream ken dadduma pay putahe.
