LAOAG CITY – Naarestar ti maysa nga incumbent a barangay kagawad a maibalang kas High Value Individual kalpasan iti naiwayat a buy-bust operation gapu iti iligal a droga iti ili ti Paoay.
Nabigbig ti suspek nga agtawen ti 47, lalaki, maysa a Brgy. Kagawad, naasawaan ken residente iti Brgy. Dolores iti ili ti Paoay.
Natiliw ti suspek kalpasan a naglako ti mapapati a shabu babaen iti maysa a nagpammarang a police pusher-buyer.
Naala ti ikot iti suspect ti sumagmamano a paraphernalia pakairamanan ti maysa a selyado a sachet ti mapapati a shabu nga addaan iti 1.3 gramo a kadagsen nga isu iti maipagarup a ginandatna nga ilako, dua a selyado a sachet ti mapapati a shabu nga addaan iti 0.11 a gramo, maysa a genuine P1,000 a nausar kas buy-bust money ken lima a peke a P500 a nausar met kas boodle money.
Malaksid kadagitoy, naala pay manipud iti suspek ti maysa a cellphone ken maysa white toyota comquest.
Kabayatanna, sumango ti suspek iti panaglabsing iti Republic Act 9165 wenno iti Comprehensive Dangerous Drugs Act of 2002.
